Persónuvernd í skólastarfi

Hvernig nemendur skrá sig inn í kennslulausn ræður því hvaða upplýsingar um þá verða til, hver hefur stjórn á þeim og hvað verður um þær síðar. Hér er flokkunin sem Öruggara nám notar. Flokkar aðganga nemenda eru í röð eftir því hve mikla stjórn skólinn hefur á gögnunum, frá mestri til minnstrar.

Aðgangar nemenda

Fjórir flokkar, frá mestri stjórn skólans á gögnum til minnstrar. Eigin aðgangur nemanda (flokkur 4) er áhættusamari en flokkarnir á undan.

1. Engin innskráning

Nemendur slá inn kóða og gælunafn sem gildir aðeins fyrir eina lotu, t.d. í spurningaleik.

• Biddu nemendur um að nota ekki fullt nafn sem gælunafn.
• Þetta er aðeins nafnlaust ef ekkert tengir þátttökuna við nemandann eftir á. Ef niðurstöður eru vistaðar og þú veist hver er hver á flokkur 3b við.

2. Skólaaðgangur

Nemandi skráir sig inn með aðgangi sem sveitarfélagið úthlutar. Þetta er traustasti kosturinn: sveitarfélagið stýrir aðganginum, getur lokað honum og eytt gögnum, og vinnslusamningur er til staðar við þjónustuaðilann.

• Þetta á við um þjónustu Google eða Microsoft sjálfra. Ef skólaaðgangurinn er notaður til að skrá sig inn í aðra lausn gildir kaflinn um innskráningu með Google eða Microsoft hér að neðan.

3. Aðgangur stofnaður af kennara

Kennarinn býr til notendur, eða bekkjarkóða sem nemendur tengjast með, beint í lausninni.

3a - með raunnafni: Lausnin geymir nafn nemandans. Lausnin þarf þá að hafa verið metin og sveitarfélagið að hafa heimilað hana.

3b - án raunnafns (dulnefni): Nemandi fær t.d. „Nemandi7“ eða „Blár-refur“.

• Þetta er ekki nafnlaust ef þú eða aðrir geta tengt dulnefnið við nemanda, t.d. með lista.
• Upplýsingarnar eru þá enn persónuupplýsingar, en áhættan er minni en með raunnafni.
• Geymdu tengilistann aðskilið frá lausninni og eyddu honum þegar notkun lýkur.

4. Eigin aðgangur nemanda

Nemandi stofnar aðgang með eigin netfangi eða netfangi forráðamanns. Þetta er áhættusamara en flokkarnir á undan:

• Sveitarfélagið hefur enga stjórn á aðganginum og getur hvorki lokað honum né eytt gögnum.
• Gögnin fylgja nemandanum út fyrir skólastarfið.
• Skilmálar eru oft ætlaðir almenningi, t.d. með auglýsingum, aldursmörkum eða rekjanleika.

Biddu nemendur ekki um að stofna eigin aðgang nema sveitarfélagið hafi heimilað það sérstaklega.

Aðgangar kennara

Ekki er mælt með að kennari noti einkaaðgang í vinnutengd verkefni. Aðgangur kennara er annars eðlis en aðgangur nemanda, því áhætturnar tengjast fullorðnum notanda en ekki barni. Hann fellur því utan röðunarinnar hér að ofan.

• Notaðu vinnuaðganginn frá sveitarfélaginu fyrir allt sem tengist starfinu.
• Settu aldrei upplýsingar um nemendur í lausn sem þú notar með einkaaðgangi, hvorki nöfn, verkefni, einkunnir né myndir.
• Ef lausn sem þú vilt nota krefst eigin aðgangs, kannaðu stöðu hennar á Torginu og hvort sveitarfélagið hefur heimilað hana.

Innskráning með Google eða Microsoft

Hnappurinn „Sign in with Google“ eða „Sign in with Microsoft“ þýðir ekki að lausnin hafi verið metin eða sé heimiluð. Þegar þú eða nemandi skráið ykkur inn í aðra lausn með skólaaðganginum fær sú lausn upplýsingar úr aðganginum, a.m.k. nafn og netfang og stundum meira.

• Kannaðu stöðu lausnarinnar á Torginu áður en nemendur nota hana.
• Ef lausnin biður um aðgang að pósti, skjölum eða dagatali, hættu við og leitaðu ráða hjá tengilið sveitarfélagsins.

Algengur misskilningur

• „Án raunnafns er það nafnlaust.“ Ekki ef hægt er að tengja dulnefnið við nemanda.
• „Ef innskráning er með skólaaðgangi er lausnin örugg.“ Nei. Innskráningin segir ekkert um hvað lausnin gerir við gögnin.
• „Forráðamenn samþykktu, svo þetta er í lagi.“ Samþykki er ekki alltaf rétta heimildin í skólastarfi og leysir ekki úr því hvort lausnin sjálf er í lagi.
• „Ég nota bara minn eigin aðgang, svo þetta snertir ekki skólann.“ Ef nemendagögn fara inn í lausnina snertir það skólann, sama hvaða aðgangur er notaður.